Elektron Məhkəmə Sistemində İddia Necə Verilir?

Texnologiyanın həyatımızın hər sahəsinə nüfuz etdiyi dövrdə məhkəmə prosesləri də bundan kənarda qalmayıb. Azərbaycanda tətbiq olunan "Elektron Məhkəmə Sistemi" vətəndaşlara iddia ərizələrini onlayn qaydada təqdim etmək imkanı yaradır. Bu, həm zaman itkisinin qarşısını alır, həm də prosesləri daha şəffaf və sürətli edir. Bəs, elektron sistem vasitəsilə iddia ərizəsi necə verilir? Bu yazımızda addım-addım izah edirik.

Elektron Məhkəmə Sistemi nədir?

Elektron Məhkəmə Sistemi (e-mehkeme.gov.az) məhkəmə orqanları ilə vətəndaşlar arasında rəqəmsal əlaqəni təmin edən onlayn platformadır. Bu sistem vasitəsilə iddia ərizəsi təqdim etmək, sənədləri göndərmək, məhkəmə iclaslarının vaxtı barədə məlumat almaq mümkündür.

İddia ərizəsi üçün ilkin addımlar

İddia ərizəsini elektron qaydada təqdim etməzdən əvvəl aşağıdakı addımları yerinə yetirmək lazımdır:

• Elektron imza və ya ASAN İmza əldə edin. Onlayn qaydada asan imza nömrəsi əldə etmək üçün +994105100451 nömrəsinə yaza bilərsiniz.

• e-mehkeme.gov.az saytına daxil olun və "E-xidmətlər" bölməsinə keçin.

• Sistemdə qeydiyyatdan keçin və şəxsi kabinet yaradın.

Əgər artıq qeydiyyatınız varsa, sadəcə sistemə daxil olmaq kifayətdir.

İddia ərizəsi necə hazırlanır?

İddia ərizəsi hazırlayarkən aşağıdakı məlumatları dəqiq daxil etmək vacibdir:

• İddiaçının və cavabdehin tam məlumatları (ad, soyad, ünvan, əlaqə vasitələri, poçt indeksi)

• İddianın predmeti və hüquqi əsasları

• Tələb edilən məbləğ (əşya, hüquq, predmet) və ya hüquqi nəticə

• İddianı əsaslandıran faktlar və sübutlar

• Ərizəyə əlavə olunan sənədlərin siyahısı

Sistemdə bu məlumatları doldurduqdan sonra sənədləri elektron formada əlavə edə bilərsiniz.

İddianın təqdim olunması və rüsum ödənişi

İddia ərizəsini sistemə əlavə etdikdən sonra dövlət rüsumunun ödənilməsi mərhələsi gəlir. Dövlət rüsumu ödənilmədikdə iddianın icraata qəbul olunması mümkün deyil. Ödənişi sistem üzərindən onlayn şəkildə həyata keçirmək mümkündür.

Ödənişdən sonra iddia ərizəsi avtomatik olaraq aidiyyəti məhkəməyə göndərilir.

Nəticələr və üstünlüklər

Elektron Məhkəmə Sistemi vətəndaşlara:

• Məhkəmə proseslərinə asan çıxış,

• Zaman və vəsaitə qənaət,

• Məhkəmə sənədlərinin izlənməsi,

• Proseslərdə şəffaflıq

kimi üstünlüklər təqdim edir.
Əgər sənədlər düzgün və tam formada hazırlanarsa, iddianın baxılması prosesi də daha sürətli irəliləyir.